阿梅發燒夾硬繼續唱
SUN娛樂…本地娛樂
梅艷芳昨晚在紅館繼續演出第四場演唱會，經過連日演出，阿梅不慎病倒發燒。昨晚梁詠琪（GiGi）擔任嘉賓時，在台上踢爆：「我好佩服和尊敬阿梅專業精神，我後台聽到話佢發燒，但仍堅持以最好狀態上台，今晚之後我會一百倍佩服佢。」身旁的阿梅即說：「歌手上到台就乜都唔記得。」及後GiGi拖阿梅在台上唱出《赤的疑惑》。
昨晚即時致電給阿梅經理人Mariane，對於阿梅發燒仍上台演出，她說：「阿梅冇喎！（GiGi講！）我後台唔知，（咁阿梅係咪發燒？）唔係，反而幫阿梅換衫工作人員就真係發燒，不過佢戴口罩，唔怕傳染。（會唔會叫阿梅做完騷去睇醫生？）唔需要，我有個醫生朋友度。」
梁漢文證實阿梅發燒
另外，學友演唱後從後台離去，被問及阿梅是否發燒時，他說：「冇喎！佢仲唱得好過第一晚，我摸過佢個頭冇事。」但梁漢文則證實阿梅確實有少許發燒。
前晚阿梅第三場個唱時遭人虛報有可疑物品，更有消防員入場搜查，雖然證實虛報，但仍有救護員在場內戒備，而阿梅則如常演出，她更首度以日本娃娃Look出現，表現風騷。
當晚有陳奕迅（Eason）、梁漢文和陶喆做嘉賓，當介紹陶喆時，阿梅形容他：「呢個嘉賓係我偶像，我好迷戀佢，聽佢歌好。」台下觀眾聞言大叫：「劉德華！」阿梅聽到露出甜笑，她說：「邊個話係劉德華，你唔好幫我再做緋聞，我係好朋友，咁會令到我尷尬。」但台下依然起哄大叫「華仔」，當阿梅介紹陶喆出場時，台下立刻靜下來，據知華仔會在尾場演出。另外，阿梅大讚Eason：「你真係天衣無縫，上天賜把靚聲畀你，好好運用，天才同白癡係一線之間，你唱歌時好正常，但平時份人就傻傻。」Eason在旁笑說：「我細個飲人奶，精力過盛！」
此外，當她由台的一邊行去另一邊時，突然有男觀眾大叫：「返來哦！」阿梅竟鬼馬地扮對方一樣說：「返來哦！」而楊紫瓊和鍾再思刻意分開到場捧阿梅。
